Ai në mënyrë të qetë dhe paqesore, lexoi deklaratën duke thënë se ky gjest i Qeverisë së Maqedonisë është turp për të gjithë qytetarët e Maqedonisë. Ai më këtë rast kritikoi edhe veprimet e mbrëmshme e disa qytetarëve, duke thënë se sjellja e tyre nuk është aspak dinjitoze.
“Тhirrjen për protestën e sotme e bëra haptas dhe ja ku jam haptas para gjithë juve, ndërsa ata që ndërtojnë tinëz edhe rrënojnë tinëz”, u shpreh Gashi.
“Meqë ditëve të kaluara u krijua një gjendje amullie e mospranimi i autorësisë së kësaj përmendoreje, e mora këtë iniciativë thjesht personale e qytetare që, përmes kësaj, ta kuptojmë saktë dhe qartë se kush e ka vendosur këtu këtë beton të quajtur Car Dushan”, nënvizoi ai. .
Këtë, tha Gashi, dëshirojmë të bëjmë përmes mbulimit me një pëlhurë të zezë. Por, ky veprim i tij u pengua nga forcat e shumta të rendit, të cilat kishin ardhur aty për ta penguar iniciativën e tij.
Përmes këtij veprimi, ai tha se do të zbulohet se kush është porositësi i kësaj vepre, siç u shpreh ai, të turpit.
“Pas kësaj mund të diskutojmë se kujt i shërben kjo që Qeveria e Republikës së Maqedonisë të iniciojë vendosjen në sheshin e Shkupit të një sundimtari, i cili nëse jo te maqedonasit, së paku te shqiptarët perceptohet si sundimtari që me dhunë i detyronte shqiptarët katolikë të bëheshin serbë dhe ortodoksë, ndërsa ata që nuk pranonin i vriste në formën më të keqe. Kjo i bie që kështu kjo qeveri i ka ofenduar më shumë se 25% të qytetarëve të saj”, nënvizoi Gashi.
Protesta e Gashit e mbështetur nga dhjetëra qytetarë, përfundoi në mënyrë të qetë, por siç vërehej, në prani të forcave të shumta policore, sidomos të njësiteve posaçme. /SHENJA/