Koalicioni i OJQ-ve, “Demokracia në Veprim” po vazhdon të monitorojë procesin e rivotimit në Mitrovicën e Veriut. Sipas vëzhguesve të Demokracisë në Veprim, deri në orën 13:00 kanë votuar, rreth 10 % të votuesve.
Mbarëvajtja e procesit të votimit:
Sipas vëzhguesve të DnV-së është raportuar se në krahasim me procesin e votimit të mbajtur me 3 nëntor, pjesëmarrja e qytetarëve është më e madhe ku shihen grupe të qytetarëve duke pritur në radhë për votim në të tri qendrat e votimit. Po ashtu vëzhguesit e DnV-së kanë raportuar raste të pjesëmarrjes së qytetarëve në votime në mënyrë të organizuar (grupe të punëtorëve).
Parregullsitë e evidentuara:
Prezenca e materialeve propaganduese - Janë evidentuar disa raste të prezencës së materialit propagandues të subjekteve politike afër qendrave të votimit.
Raste të votimeve familjare – Në shumicën e vendvotimeve, janë raportuar raste të votimeve familjare.
Probleme me listat e votuesve – Gjithashtu në shumicën e vendvotimeve janë identifikuar shumë raste, ku votuesit nuk kanë arritur t’i gjejnë emrat e tyre në listën e votuesve dhe të njëjtit janë detyruar të votojnë me kusht.
DnV edhe më tutje i bënë thirrje qytetarëve të Kosovës që të dalin në zgjedhje për të shfrytëzuar të drejtën e tyre kushtetuese./kosovasot/